ليه تسكن في المدن والتجمعات الجديدة؟

لو زهقان من الزحمة وخنقة العربيات والصوت العالي في المناطق الشعبية وبتدور على سكن في منطقة راقية وهادية ليك ولأولادك، فالمدن والتجمعات السكنية الجديدة هي أفضل مكان ممكن يوفرلك المميزات دي، فالمدن الجديدة بدون شك بقت واجهة وحلم لكل شخص عايز سكن مميز وفي نفس الوقت يكون استثمار مربح له.

فالمدن الجديدة في مصر وعلى مدار الـ 30 سنة اللي فاتت، زادت الحاجة ليها وخاصة بعد الزحام اللي أصبحت بتعاني منه العاصمة والمدن الكبيرة واللي وصل الحال فيهم لمرحلة الانفجار السكاني، المدن الجديدة دي تم التخطيط ليها عشان تكون الأفضل من حيث التخطيط العمراني والبنية التحتية وتوافر الخدمات والمرافق وتقديم تسهيلات للمواطنين اللي عايزين يشتروا الأراضي ويبنوا عليها وحداتهم السكنية.

وسواء كنت شاب مقبل على الزواج بيحاول يدور على شقة أو رب منزل بيحاول يمتلك وحدة سكنية في مكان أفضل وأحسن من اللي هو موجود فيه حاليا، ومتردد ما بين إنك تسيب المنطقة اللي انت عايش فيها وتروح تاخد شقة في مدينة من المدن الجديدة فالبوست ده هنتكلم فيه عن مزايا تخليك تقرر تمتلك وحدة سكنية في المدن الجديدة تبعد بيها عن الزحام في العاصمة والمدن الكبرى:

- المدن الجديدة بتجمع بين الهدوء والرقى وفى نفس الوقت بتتمتع بسهولة الوصول إليها، ده بفضل المحاور والطرق السريعة والرئيسية اللي تم إنشائها في الفترات اللي فاتت واللي بتربطها بجميع الأماكن الحيوية.

- ده غير إن السكن والحياة في المدن الجديدة له مزايا كتير أهمها الحياة الصحية اللي بتوفرها للسكان بتوعها وده بسبب المساحات الخضراء والمناظر الطبيعية الرائعة التي بتعطيها شكل جمالي متفرد وكمان بعد المدن دي عن الزحمة والتكدس المروري.

- المدن الجديدة تعتبر فرصة تقدر تستثمر فيها ليك ولأولادك مستقبلا، وده بسبب الطلب المتزايد على السكن في العقارات وخاصة في المدن الجديدة لأن سعر المتر فيها بيرتفع كل يوم بسبب التطور في الخدمات والمرافق الموجودة فيها.

- التنوع في أشكال وأحجام الوحدات السكنية فهتقدر تلاقي كل اللي انت محتاجه في بيتك سواء من عدد الغرف أو المساحات الواسعة والمختلفة، ده غير إن لكل تجمع سكني فيه شكل معماري بيميزه عن التجمعات السكنية التانية، بالإضافة إلى التقسيم والتخطيط المتميز للغاية مقارنة بالمناطق الشعبية المزدحمة، وده ممكن نلاحظه مثلا في وسع حجم الشوارع وتميزها بالهدوء وتوافر أماكن متعددة لركن السيارات فيها.

- من أهم مميزات المدن والتجمعات السكنية الجديدة كمان إنها بتوفر كل الخدمات الممكنة بداخلها من غير ما تضطرك إنك تروح لأماكن تانية بعيدة عنك عشان تجيب احتياجاتك منها، فهتلاقي فيها نوادي وبنوك ومولات تجارية ومحلات ومطاعم ومستشفيات ومدارس وغيرها من الخدمات.

- تناسب حجم الخدمات المقدمة في المدن دي مع عدد السكان وده بسبب التخطيط الجيد اللي تم بشكل مسبق لكل وحدة سكنية واحتياجاتها المتوقعة

- السكن في المدن الجديدة بيوفر الخصوصية لكل المقيمين فيها، بجانب كمان توفيرها للأمن والحراسة لكل شخص جواها وخاصة لو هتسكن في كومبوند سكني وده لأن لكل كمبوند حراسة خاص به هتضمن توفير الحماية ليك ولأسرتك وممتلكاتك

- النظافة والصيانة الدورية من خلال وجود أعمال نظافة وصيانة للمدن والتجمعات السكنية دي بشكل دوري عشان المرافق بتاعتها تعمل بكامل كفاءتها على مدار العام

- وبالنسبة للشغل والوظائف، ففي كتير من الشركات والمؤسسات ابتدت تنقل مراكزها الرئيسية للمدن الجديدة، ده غير إن نقل حياتك للمنطقة الجديدة دي، ممكن يتيح ليك فرصة إنك تبدأ مشروعك الخاص لأنها بتكون لسه بيئة ناشئة للتجارة والأعمال الصغيرة

أكيد طبعا كل حاجة زي ما ليها مميزات فهي ليها عيوب، بس الحاجة اللي هتقدر تحدد الاختيار الصح اللي هيكون كويس بالنسبالك هي مدى تناسب المكان والوحدة السكنية للمتطلبات والخدمات اللي انت عايزها تبقى موجودة فيها.