.jpeg)
ليه تشتري شقة في عمارة تحت الإنشاء؟
الإجابة على السؤال ده بتبقى مُحيرة نوًعًا ما، خاصة وإن الشقة في العمارة تحت الإنشاء بتمتلك مجموعة من المميزات، ونفس الكلام بالنسبة للعمارة تامة البناء، وبالتالي الاختيار ما بينهم بيبقى معتمد على طبيعة احتياجاتك، وإللي بتكون متوقفة على مجموعة مختلفة من المعايير، زي المساحة، سعر المتر، الموقع، دور الشقة، الخدمات والهدف من الشراء أكيد.
طب وإيه هي المميزات إلي ممكن تخليك تاخد شقة في عمارة لسه متبنتش؟!
في مميزات كتيرة جدًا ممكن نلاقيها في العمارة تحت الإنشاء، ومنلاقيهاش في العمارة تامة البناء، بالشكل إلي يشجعنا نشتري شقتنا في النوعية دي من العمارات، زي:
-سعر المتر:
في العادة، سعر المتر في العمارة تحت الإنشاء بيكون أرخص طبعًا من العمارة تامة البناء، وده لعدد كبير من الأسباب، منها مثلًا رغبة الشركة انها تجمع سيولة تقدر من خلالها تكمل مشروعها، وبالتالي تحاول على قد ما تقدر إنها تجذبك وتقنعك إنك تشتري في مشروعها ، عن طريق تقليل سعر المتر، بالإضافة لإن سعر الشقة نفسه بيبقى أقل.
-اختار الدور إلي يريحك:
من ضمن الحاجات المهمة جدًا إللي لازم تحطها في اعتبارك وإنت رايح تشتري شقة جديدة، هي الدور إللي تختار فيه شقتك ، خاصة مثلًا إن الأسانسير ممكن ياخد شوية وقت على ما يركب.
في العمارات تحت الإنشاء، فالأغلب هتلاقي معظم الشقق متوفرة، وبالتالي هتقدر تحدد الدور إلي إنت عاوز تسكن فيه براحتك، عكس العمارات مُسبقة البناء، وإلي ممكن تلاقي عدد كبير من الشقق فيها متباعة.
-صمم شقتك:
قدرتك على إنك تصمم شقتك بالطريقة إلي تعجبك، تعتبر من أهم مميزات إنك تشتري شقة في عمارة تحت الإنشاء.
تصميمك للشقة بتاعتك بالطريقة إلي توفيلك احتياجاتك هتخليك متعملش أي تعديل فيها على المدى البعيد، وكمان هيوفرلك المصاريف إلي ممكن تضيع على التعديلات إلي ممكن تعملها على الشقة تامة البناء.
-قسط براحتك:
في العمارات تحت الانشاء، عادة الشركة بتديلك الفرصة إنك تسدد تمن شقتك براحتك، خاصة وإن العمارة دي بتكون لسه متبنتش أصلًا.
يعني مثلًا لو في الشقق المبنية مدة القسط فيها بتكون من 2-3 سنين، هتلاقي المدة بتتراوح ما بين 4-5 سنين وساعات أكتر في العمارات تحت الإنشاء "مدد التقسيط الطويلة دي في العادة برده بنلاقيها في أغلب الكومباوندات أو المدن تحت الإنشاء".
رغم المميزات الكتير إلي بتتميز بيها الشقق تحت الإنشاء، إلا إنه في نفس الوقت في مجموعة من العيوب إللي لازم ناخد بالنا منها قبل ما نشتري، زي:
-الاستلام:
من ضمن أهم العيوب إللي ممكن نلاقيها في الشقق تحت الإنشاء، إن مدة استلامها في العادة بتتأخر بشكل كبير، وده نتيجة إن العمارة مش بتكون لسه إتبنت في الأساس.
وبالتالي، إللي إشترى الشقة دي مش بيقدر إنه يعمل فيها أي حاجة غير لما العمارة أو المبنى كله يخلص، وده إلي ممكن ياخد مش أقل من سنتين في بعض الأحيان.
طبعًا العيب ده مش بيبقى موجود في الشقق المبنية، لإنك بمجرد ما بتدفع تمنها "أو حتى المقدم" بيبقى عندك إمكانية إنك تستلمها وتقدر تجهز فيها بالشكل إلي يناسبك وإلي إنت عاوزه.
-مش إللي إنت اتفقت عليه:
في أوقات كتيرة جدًا ممكن يحصل نوع من الخلاف بينك وبين الشركة على البنود إلي اتفقتوا عليها، وإللي إنت مستلمتهاش في شقتك بالشكل إلي إنت عاوزه.
بيجي تحت البنود دي حاجات كتير، زي صافي مساحة الشقة "إلي هي: إجمالي مساحة الشقة – مساحة الخدمات" وكمان التصميم إلي إنت عاوزه في شقتك.
وبالتالي، عشان تضمن حقك بشكل كامل، إسأل الأول علي الشركة دي، وعلى سمعتها في السوق، وكمان خليك متابع معاهم ومع العمال إلي شغالين في شقتك بشكل مستمر، عشان تقدر إنك تطلع باللي إنت عاوزه في النهاية.
أكيد البند ده برده مش هنلاقيه في الشقق تامة البناء، ليه؟! لإن كل حاجة بتبقى على نور قدامك، صافي مساحة الشقة وتصميمها، مش مجرد رسومات.
افترض معايا كده... لو في عمارة مبنية وجنبها على طول عمارة تحت الإنشاء، والإتنين متشابهين فنيًا في كل حاجة، هتشتري شقتك في أني عمارة فيهم؟!
المؤشر للتطوير العقاري
-1708430160.webp "مشروع الاندلس القطعة 64")
